كلمات الشاعر سيد موسي :: لرحيل محمد العوض دغورابي

يامحمد ... الايام ابت تجمعنى بيك ... قبل الرحيل
كان نفسى اوادعك و ادعو ليك فى سكة السفر الطويل...
كان نفسى اشارك الليل بكاه ... واحزن مع حزن النخيل...
كان نفسى ابكى مع الضفاف و النيل ومويتو السلسبيل ..
يامغنى للنيل و الجروف و الخضرة و الوجه الجميل ..
يا واهب الناس الفرح و فى الدنيا عدمان القليل !!!!
مين فيك يعزوا الناس سواى ..
و فى الناس منو الببكيك بكاى؟؟
خاويتنى فى المر و الحلو .. وحلقت بى جناح الشعر ياغالى فى الافاق معاى ..
انا و انت عصفورين حزن .. ساكنين فضاء الله الفسيح..
و قلوبنا تنبض بالشعر لابتهدا لا يوم تستريح ..
وين مالت الافراح نميل .. تسوقنا ريح و تجيبنا ريح..
وقفاتنا كم كانت تطول فى الخضرة و الوجه المليح..
و الدنيا بعد الالفة ديك قلبت لنا الوجه القبيح... و بيناتنا اتكتب الفراق..
و غنانا اتبدل نويح..
يا الله .. يا واهب النعم
يامن يسبح بى جلالك و قدرك الحجر الاصم ..
يا من عنت ليك الوجوه ..يا خالق الروح من عدم ..
تشمل محمد رحمتك .. كم ليهو فى فرجك عشم ..
انسان بسيط فى الدنيا عاش مجروح فؤاد للفرحة يوم ماضاق طعم ..
لكنه رغم الحالة ديك .. ماسمعتو يلعن قسمتو .. لاشفتو للواقع انهزم ...